Danny Murphy: Algjört grín að heimta að Mourinho verði rekinn

Danny Murphy, fyrrum leikmaður Liverpool, Tottenham og Fulham í ensku úrvalsdeildinni og núverandi knattspyrnuspekingur á BBC, tjáði um stöðu Jose Mourinho hjá Chelsea í pistil sem hann skrifaði á BBC-síðuna.

Murphy skilur ekki í því af hverju menn búast við því að Jose Mourinho verði rekinn þrátt fyrir skelfilega byrjun hjá Chelsea á þessu tímabili. Nú síðast datt liðið út úr enska deildabikarnum í vikunni.

„Það er algjört grín að það sé verið að tala um að Jose Mourinho sé næsti knattspyrnustjóri ensku úrvalsdeildarinnar til að taka pokann sinn," byrjar Danny Murphy pistilinn sinn.

„Velgengnin hjá Mourinho í  gegnum tíðina og þá sérstaklega hjá Chelsea, þýðir að hann hefur öðlast réttinn til að eiga þrjá slæma mánuði án þess að fá sparkið," skrifar Murphy.

„Hann ætti að fá sex slaka mánuði eða jafnvel eitt slakt tímabil því allir knattspyrnustjórar lenda í slíku meira segja Sir Alex Ferguson hjá Manchester United," skrifar Murphy.

Chelsea var enskur meistari á öðru tímabili Jose Mourinho með liðið en árið á undan varð liðið í þriðja sæti. Chelsea hefur þegar tapað tveimur fleiri deildarleikjum á þessu tímabili en á öllu tímabilinu í fyrra.

Danny Murphy telur að stór hluti leikmannahópsins hafi ekki verið kominn í nógu gott form þegar tímabilið hófst og þá er hann á því að heppnin hafi ekki verið með liðinu á leiktíðinni.

Murphy er á því að frammistaðan í tapinu á móti West Ham hafi verið ein sú besta á tímabilinu og að liðið hafi líka átt að vinna Stoke í enska deildabikarnum í vikunni.

Að mati Murphy er vandamálið ekki það að leikmenn Chelsea séu hættir að spila fyrir knattspyrnustjórann sinn. Það má sjá allan pistil hans hér.