Moreno: Rodgers fyllti mig bræði

Alberto Moreno, bakvörður Liverpool, segist hafa verið fullur af reiði undir stjórn Brendans Rodgers þar sem honum fannst hann ekki njóta trausts.

Honum líður mun betur undir stjórn Jürgens Klopps sem komst á sigurbraut með Liverpool-liðið í deildabikarnum í vikunni.

Moreno byrjaði ekki leik í úrvalsdeildinni fyrr en 20. september, en byrjaði svo fyrstu þrjá leikina undir stjórn Þjóðverjans.

„Hér hefur orðið 100 prósent breyting. Allt er öðruvísi,“ segir spænski landsliðsmaðurinn.

„Mér fannst Rodgers ekki hafa svo mikla trú á mér, sérstaklega í byrjun tímabilsins. Hann sagði mér að æfa vel en svo fékk ég ekki að spila fyrstu leiki tímabilsins.“

Rodgers hélt Moreno heitum og sagði að hann fengi tækifærið. Svo hélt Liverpool hreinu gegn Stoke í fyrsta leik og þá sagði Rodgers honum að hann ætlaði ekki að gera breytingar á varnarlínunni.

„Það kom aldrei til greina að fara. Ég vil vera hér að eilífu en ég var fullur af reiði, eiginlega bræði. Ég skildi ekki hvers vegna ég fékk ekki tækifærið,“ segir Alberto Moreno.