Stjóri Arons býst alveg við því að hann vilji fara í janúar

Aron Einar Gunnarsson, landsliðsfyrirliði karlalandsliðsins í fótbolta, hefur ekki verið fastamaður í byrjunarliði Cardiff í ensku B-deildinni á þessari leiktíð.

Akureyringurinn var meiddur í byrjun tímabils og missti þá sætið sitt, en honum hefur gengið illa að vinna sætið aftur.

Aron Einar hefur verið lykilmaður hjá Cardiff síðan hann gekk í raðir liðsins frá Coventry fyrir fjórum árum en er nú í stöðu sem hann þekkir ekki vel.

Velski fréttavefurinn Wales Online fjallar mikið um bekkjarsetu Arons Einars og er með kosningu þar sem spurt er hvort miðjumaðurinn öflugi eigi að fá að spila meira.

Nokkuð ljóst er að stuðningsmenn Cardiff eru byrjaðir að sakna Arons Einars því 75 prósent þeirra sem hafa svarað vilja sjá meira af íslenska landsliðsfyrirliðanum.

„Gunnarsson er orðinn einn af bestu leikmönnunum sem Cardiff hefur fengið á þessari öld,“ skrifar blaðamaðurinn Scott Johnson í pistli á Wales Online.

Cardiff á leik í kvöld gegn Bristol, en leikurinn verður í beinni útsendingu á Stöð 2 Sport 3 HD klukkan 19.40.  Óvíst er hvort Aron verði í byrjunarliðinu og er knattspyrnustjóri liðsins, Russell Slade, undirbúinn fyrir ósk um félagaskipti frá Aroni í janúar.

„Aron gæti komið til mín í janúar en það á mikið eftir að gerast fram að því. Ég býst enn við því að hann spili marga leiki fram að 1. janúar,“ segir Slade í viðtali við Wales Online.

„Ef hann er að spila býst ég ekki við að hann komi og biðji um að fara. Þetta fer bara eftir stöðunni sem hann verður í,“ segir Russel Slade.