Jón Dagur spilaði 16 ára fyrir varalið Fulham

Jón Dagur Þorsteinsson, 16 ára gamall leikmaður enska B-deildarliðsins Fulham, spilaði með U21 árs liði félagsins í varaliðsdeildinni í gær og þótti standa sig vel.

Jón Dagur, sem verður 17 ára í nóvember, var seldur frá HK til Fulham í sumar, en hann varð í fyrra yngri leikmaðurinn til að spila mótsleik með meistaraflokki HK.

Fulham vann leikinn gegn West Ham á Upton Park, 2-0, og hrósaði þjálfari liðsins, Peter Grant, Íslendingnum unga eftir leik.

„Við vorum með hinn 16 ára gamla Jón Dag með okkur og hann stóð sig mjög vel,“ sagði Peter Grant við heimasíðu Fulham eftir leikinn.

Jón Dagur spilaði tíu leiki með HK í deild og bikar í fyrra og í sumar áður en hann gekk í raðir Fulham.

Hann á að baki tólf leiki fyrir U17 ára landslið Íslands og þá spilaði hann sína fyrstu leiki fyrir U19 ára liðið þegar það mætti Norður-Írlandi í tveimur vináttuleikjum í byrjun mánaðarins.