Útgöngubann í Baltimore úr gildi

Útgöngubann í borginni Baltimore í Bandaríkjunum, sem sett var á fyrr í vikunni, hefur verið afturkallað. Frá þessu er greint á vef BBC. Miklar óeirðir brutust út í borginni í kjölfar dauða Freddie Gray þann 19. apríl, sem lést af sárum sínum á sjúkrahúsi eftir að hafa orðið fyrir skaða á mænunni eftir átök við lögreglu.

Útgöngubannið fól í sér að íbúum var skylt að halda sig innandyra milli klukkan tíu á kvöldin og til fimm á morgnana. Borgarstjóri Baltimore, Stephanie Rawlings Blake, setti bannið á í kjölfar mikilla óeirða þar sem meðal annars var kveikt í byggingum og brotist inn í verslanir. Mótmæli hafa haldið áfram síðustu daga en þau hafa verið friðsæl að mestu og sagði Blake í dag að hún vildi ekki hafa bannið í gildi lengur en þörf væri á.

Nú á föstudag tilkynnti saksóknari í Baltimore um það að hún teldi dauða Gray manndráp og að sex lögregluþjónar sem komu að handtöku Gray yrðu sóttir til saka.