McClaren hafnaði Newcastle

Steve McClaren, knattspyrnustjóri Derby County, hafnaði tilboði Newcastle um að stýra liðinu í síðustu þremur leikjum tímabilsins.

Forráðamenn Newcastle höfðu samband við McClaren á laugardaginn eftir að liðið steinlá 3-0 fyrir nýliðum Leicester City.

McClaren hafnaði því og hann tilkynnti forráðamönnum Derby einnig að hann myndi ekki taka við Newcastle í sumar. John Carver mun því halda áfram sem knattspyrnustjóri liðsins.

Newcastle hefur verið í tómu tjóni á árinu 2015 eða allt síðan Carver tók við stjórnartaumunum af Alan Pardew sem fór til Crystal Palace.

Newcastle hefur aðeins unnið tvo af 16 deildarleikjum sínum á árinu 2015 og situr í 15. sæti deildarinnar, tveimur stigum frá fallsæti.

Newcastle á eftir leiki gegn West Brom og West Ham á heimavelli og QPR á útivelli.

McClaren og lærisveinar hans í Derby misstu af sæti í umspili um sæti í úrvalsdeildinni eftir slæman endasprett í B-deildinni, þar sem liðið vann aðeins tvo af síðustu 13 leikjum sínum.