Gott að vera móðir á Íslandi en betra í Noregi

Norðurlöndin hafa algjöra sérstöðu þegar kemur að stöðu mæðra í heiminum, ef marka má nýja skýrslu Barnaheilla sem kom út í dag. Noregur skipar fyrsta sætið, Finnland annað og Ísland það þriðja. Þá eru það frændur okkar í Danmörku og Svíþjóð sem sitja í fjórða og fimmta sæti.

Afríkulöndin sunnan Sahara raða sér sem fyrr í botnsætin, en níu af ellefu neðstu löndunum eru í Afríku. Þá eru mæður í Sómalíu annað árið í röð í verstri stöðu. Þar er staðan svo slæm að tæplega fimmtán prósent barna lifa ekki fram að fimm ára afmælisdeginum.

Staðan slæm í Bandaríkjunum

Þá hafa Bandaríkin fallið niður um tvö sæti á milli ára og eru nú í 33. sæti. Í skýrslunni kemur fram að ein af hverjum 1.800 þarlendum mæðrum eigi hættu á að látast af vandkvæðum vegna meðgöngu eða fæðingar. Það er hæsta tíðni á Vesturlöndum en kona í Bandaríkjunum er tíu sinnum líklegri til að deyja við barnsburð en pólsk eða austurrísk kona, að því er fram kemur í skýrslunni.

Jafnframt er bent á fjölda borga þar sem lífslíkur hafa aukist. Unnið hefur verið að því að gera heilbrigðiskerfið aðgengilegra og ódýrara fyrir fátækustu borgarfölskyldurnar. Meðal þessara borga eru Kampala í Úganda, Addis Ababa í Eþíópíu og Kaíró í Egyptalandi.

Skýrslan um stöðu mæðra kom út í sextánda sinn í dag og var hún kynnt af Sigrúnu Ósk Kristjánsdóttur sjónvarpskonu. Hún hefur að undanförnu kynnt sér stöðu mæðra á Íslandi í þættinum Margra barna mæður sem sýndur var á Stöð 2.

Samkvæmt skýrslunni er staða mæðra í borgarsamfélögum til sérstakrar skoðunar.