Silva útskrifaður af spítala

Spánverjinn David Silva var útskrifaður af sjúkrahúsi í gærkvöldi en hann var borinn af velli í leik Manchester City og West Ham í gær eftir þungt höfuðhögg.

Stöðva þurfti leikinn í nokkra stund til að hlúa að Silva sem virtist vankaður eftir að hafa fengið olnbogaskot frá Cheikhou Kouyate, leikmanni West Ham.

Hann var settur í hálskraga og borinn af velli en Silva skrifaði á Twitter-síðu sína í gær að allar rannsóknir hafi komið vel út fyrir hann og að hann væri kominn aftur heim til sín.

Manuel Pellegrini greindi frá því eftir leikinn í gær að verið væri að skoða hversu alvarlegir áverkar Silva væru, sérstaklega kinnbeinið og á hálsi. Hann sagðist þó ekki telja að Kouyate hafi ætlað sér að skaða Silva.

„Dómarinn sá þetta vel og hann ákvað að þetta hafi verið óviljandi. Ekkert meira gerist.“