Missti fótinn við miðjan sköflung

Ungi maðurinn sem slasaðist í fjórhjólaslysi í Grafarvogi þann 18. apríl síðastliðinn er útskrifaður af gjörgæslu. 

Ungi maðurinn heitir Aron Vignir Sveinsson og er 23 ára gamall. Aron slasaðist alvarlega á hægri fæti, hálsi og höfði. Hrafnhildur Katrín Pétursdóttir, móðir Arons, segir í samtali við Vísi að því miður hafi ekki verið hægt að bjarga fætinum en hann var tekinn af við miðjan sköflung.

„Hann fær gervifót en núna er hann að mestu rúmliggjandi, hann er þó búin að prófa að fara í hjólastól og á að fara í hann flesta daga.“

Hrafnhildur er búsett á Hvammstanga en er hjá syni sínum í Reykjavík og segist verða þar þar til hún veit eitthvað meira. „Þetta var rosalega erfitt fyrst, mikil sorg, en hann er allur að koma til. Hann hefur mikinn húmor fyrir þessu sem hjálpar.“ 

Hrafnhildur segir að brandarinn sem hann sjái við þetta sé að nú þurfi hann ekki að klippa á sér eins margar táneglur.

Aron og kærastan hans, Harpa Harðardóttir, eiga von á barni á næstu dögum. Æskuvinir Arons hafa stofnað styrktarreikning til að aðstoða fjölskylduna á þessum erfiðu tímum. Hrafnhildur segir að söfnunin hafi gengið vel. 

„Það eru ótrúlega margir sem vilja hjálpa þeim,“ segir hún og bætir við að sá stuðningur sé ómetanlegur.

Í frétt Vísis í síðustu viku kemur fram að lögreglan sé með málið í rannsókn en ekki var um árekstur við annað ökutæki að ræða, svo virðist vera sem ökumaðurinn hafi misst stjórn á fjórhjólinu og oltið.

Meðfylgjandi er númer á styrktarreikningnum:

0153-26-065003

Kt. 230190-3139