Missti stjórn á fjórhjólinu: Liggur enn á gjörgæslu

Ungur maður sem slasaðist á fjórhjóli í Grafarvogi á laugardagskvöld liggur enn á gjörgæslu. Samkvæmt upplýsingum frá lögreglu slasaðist hann á höfði og fæti. Maðurinn er rúmlega tvítugur. Málið er í rannsókn en þó liggur ljóst fyrir að ekki var um árekstur við annað ökutæki að ræða. Virðist maðurinn hafa misst stjórn á hjólinu og við það hafi það oltið. Allt lítur út fyrir að hann hafi að lokum orðið undir hjólinu. Lögregla hyggst taka viðtöl við vitni í vikunni til þess að varpa enn frekara ljósi á hvað átti sér stað.  

Engar upplýsingar fást frá gjörgæsludeild um hvenær verður hægt að útskrifa manninn, hversu alvarlegir áverkarnir eru né hvort hann er með meðvitund.

Slökkvilið var kallað að slysstað um helgina til þess að þrífa vettvang.