Dagskrá Sigmundar fæst ekki uppgefin: „Ekki í anda þessa atburðar“

„Í ljósi þess að margir voru með einhverjar fyrirspurnir um þetta þá settum við bara þessa tilkynningu inn á vefinn, og við gerum ekkert ráð fyrir að tjá okkur neitt meira um það. Þetta er nokkuð ítarlegt og í sjálfu sér ekkert meira um það segja,“ segir Sigurður Már Jónsson, upplýsingafulltrúi ríkisstjórnarinnar, um fjarveru Sigmundar Davíðs Gunnlaugssonar frá samstöðufundinum í París í gær.

Þar komu saman fjöldamargir til að sýna samstöðu gegn árásunum í París undanfarna dag og voru viðstaddir fjöldi þjóðarleiðtoga ásamt háttsettum embættismönnum.

Þar á meðal voru David Cameron forsætisráðherra Breta, Angela Merkel kanslari Þýskalands, Mariano Rajoy forsætisráðherra Spánar, Sergei Lavrov utanríkisráðherra Rússa og Ahmet Davutoglu forsætisráðherra Tyrkja. Þá voru allir forsætisráðherrar norðurlandanna á samstöðufundinum.

Í yfirlýsingu frá forsætisráðuneytinu í gær vegna fjarveru Sigmundar Davíðs kom fram að samverkandi þættir hefðu haft áhrif á það að ráðherra sá sér ekki fært að mæta og í því samhengi nefndur skammur fyrirvari, dagskrá forsætisráðherra og ferðatími til Parísar.

Sigurður Már gat ekki gefið upplýsingar um dagskrá ráðherra þegar Vísir spurðist fyrir um hana en sagði þessa yfirlýsingu hafa verið nokkuð ítarlega.

„Ekki í anda þessa atburðar“

„Þetta voru samverkandi þættir og það sjá nú allir líka að ferðalög frá Íslandi er alltaf aðeins flóknari en að fara frá Evrópu. Það blasir nú eitt við. Þetta var mjög skammur fyrirvari. Þetta hefur ekkert með virðingu eða samstöðu með Frökkum að gera. Forsætisráðherra átti mjög innilegt viðtal við sendiherrann á því augnabliki. Ég sem gamall blaðamaður, og við öll, erum slegin yfir þessum hryllingi. Ég veit ekki hvort menn vilji formgera eitthvað í kringum það að forsætisráðherra hafi ekki séð sér fært um að mæta þarna. Ég átti mig ekki á því, mér finnst það ekki í anda þessa atburðar,“ segir Sigurður Már og fæst því dagskrá forsætisráðherra ekki uppgefin.

„Við höfum verið að koma með þessar útskýringar sem þarna voru og við biðjum menn bara að horfa til þeirra.“

Obama og Kerry gagnrýndir

Sigmundur Davíð var þó ekki sá eini sem komst ekki til Parísar sökum anna. Þeirra á meðal eru Barack Obama, forseti Bandaríkjanna, og John Kerry utanríkisráðherra. Ekki hafa fengist svör við því hvers vegna Obama sá sér ekki fært um að mæta en Obama lofaði Frökkum stuðningi Bandaríkjamanna á föstudag.



Þær fregnir bárust frá Hvíta húsinu á sunnudag að Obama muni halda alþjóðlegan fund í Washington í febrúar þar sem viðbrögð við ofbeldisverkum öfgamanna verða rædd.

Obama og Kerry eru harðlega gagnrýndir fyrir fjarveruna en Kerry hefur gefið lítið fyrir þessa gagnrýni og hefur bent fjölmiðlum á að hann sé væntanlegur til Parísar á fimmtudag. Þá benti hann einnig á að fulltrúar utanríkisráðuneytis Bandaríkjanna hefðu verið viðstaddir fundinn.

Kerry gaf þau svör að hann sé í opinberum erindagjörðum á Indlandi og að hann hefði gjarnan viljað vera viðstaddur samstöðufundinn en það hefði ekki verið mögulegt vegna anna.

Þetta átti einnig við um Gunnar Braga Sveinsson utanríkisráðherra sem var upptekinn í New York vegna undirbúnings ráðstefnu um jafnrétti kynjanna. Hins vegar var Nína Björk Jónsdóttir sendiráðunautur í París fulltrúi Íslendinga í göngunni.