Liverpool vill spila á móti Gerrard

Liverpool-liðið og Steven Gerrard verða mögulega á sama velli í sumar en ekki eins og margir stuðningsmenn Liverpool sáu fyrir sig.

Liverpool er á leiðinni til Bandaríkjanna á undirbúningstímabilinu næsta sumar og efst á óska listanum er að fá leik á móti Steven Gerrard og félögum hans í Los Angeles Galaxy. BBC segir frá þessu.

Steven Gerrard er í Liverpool þessa dagana þar sem tímabilið í Bandaríkjunum er búið. Hann hætti hjá Liverpool síðasta vor eftir að hafa eytt 28 árum hjá félaginu og spilað 708 opinbera leiki með aðalliðinu.

Einhverjir stuðningsmenn Liverpool dreymdu eflaust um að sjá Gerrard  snúa aftur og klára núverandi tímabil með Liverpool-liðinu svipað og Frank Lampard og David Beckham hafa gert með evrópskum liðum í sínum fríum frá bandarísku deildinni, en knattspyrnustjórinn Jürgen Klopp lokaði strax á það. Gerrard má hinsvegar æfa með Liverpool-liðinu.

Steven Gerrard lék 13 leiki með Los Angeles Galaxy á tímabilinu og skoraði í þeim 2 mörk. Liðið datt hinsvegar út úr fyrstu umferð í úrslitakeppninni. Hinn 35 ára gamli Gerrard ýjaði að því eftir tímabilið að hann myndi leggja skóna á hilluna eftir næsta tímabil.

Liverpool hefur farið áður til Bandaríkjanna á undirbúningstímabili sínu en leikir liðsins hafa þá að mestu farið fram á Austurströndinni. Nú er hinsvegar á dagskrá að fara á Vesturströndina og þar hefur vera Steven Gerrard hjá Los Angeles Galaxy mikið að segja.