Newcastle skaust upp úr fallsæti með naumum sigri | Sjáðu markið hjá Perez

Ayoze Perez skoraði eina mark leiksins í naumum 1-0 sigri Newcastle á Bournemouth í fyrsta leik ensku úrvalsdeildarinnar þessa helgi en óhætt er að segja að leikmenn Bournemouth hafi átt eitthvað skilið úr þessum leik.

Mark Perez sem sjá má í spilaranum hér fyrir ofan kom nokkuð gegn gangi leiksins en Rob Elliot, markvörður Newcastle, þurfti oft að verja vel í fyrri hálfleik og leiddu gestirnir frá Newcastle í hálfleik 1-0.

Leikmenn Bournemouth reyndu að færa sig framar á völlinn eftir því sem leið á leikinn en án árangurs. Leikmönnum Newcastle tókst að standast allar sóknir Bournemouth og tóku því stigin þrjú í fyrsta leik dagsins.

Með sigrinum skaust Newcastle upp fyrir Bournemouth og upp úr fallsæti í bili en lærisveinar Steve McClaren eru í 16. sæti með 10 stig að tólf leikjum loknum.

Bournemouth hefur sogast niður í fallbaráttuna og situr í 18. sæti með aðeins átta stig að tólf leikjum loknum en liðið hefur aðeins unnið einn leik síðustu tvo mánuði í ensku úrvalsdeildinni.