Hjartaaðgerð bjargaði lífi Tony Adams

Arsenal-goðsögnin Tony Adams var hætt komin á dögunum en læknar í Aserbaijan björguðu lífi hans.

Adams er íþróttastjóri hjá félagi í Aserbaijan og var áður þjálfari liðsins sem heitir Gabala.

Hann var að taka æfingu á dögunum er hann fékk mikinn verk fyrir hjartað. Hann var í kjölfarið fluttur á spítala og beint í aðgerð þar sem lífi hans var bjargað.

„Ég var með stíflaða æð og því var farið með mig beint undir hnífinn. Ég er afar þakklátur öllu starfsfólkinu á sjúkrahúsinu í Baku," sagði Adams sem er nú að jafna sig eftir aðgerðina.

Adams er orðinn 49 ára gamall. Hann lék með Arsenal allan sinn feril og vann ensku úrvalsdeildina þrisvar með félaginu. Alls lék hann 669 leiki fyrir Arsenal og 66 sinnum fór hann í enska landsliðsbúninginn.