Sakho slapp við ákæru

Diafra Sakho, leikmaður West Ham, verður ekki ákærður fyrir líkamsárás sem átti sér stað í sumar. Sakho var handtekinn nokkrum dögum fyrir fyrsta leik liðsins á tímabilinu en West Ham mætti þá Arsenal og vann óvæntan 2-0 sigur.

Lögreglan í Bretlandi hefur staðfest að 25 ára maður hafi fengið viðvörun fyrir þátt sinn í atvikinu en að hann verði ekki ákærður.

Sakho er fastamaður í liði West Ham sem er í sjötta sæti ensku úrvalsdeildarinnar. Hann var á skotskónum þegar West Ham lagði bæði Liverpool og Manchester City á útivelli í haust.

Sakho var einnig gefið að sök að hafa hótað vitni í málinu en hann hefur ávallt neitað sök.