Van Gaal: Darmian byrjar tímabilið sem varamaður

Louis Van Gaal, knattspyrnustjóri Manchester United, tjáði blaðamönnum það í gær að ítalski landsliðsmaðurinn Matteo Darmian, einn af nýju leikmönnum Manchester United, yrði á varamannabekknum þegar flautað verður til leiks í ensku úrvalsdeildinni í næsta mánuði.

Talið var líklegt að Darmian myndi verða í byrjunarliði Manchester United í fyrsta leik liðsins gegn Tottenham þann 8. ágúst næstkomandi en brasilíski bakvörðurinn Rafael er á förum frá félaginu.

„Við fengum Darmian til liðs við okkur til að auka við breiddina, Antonio Valencia er ennþá fyrsti kostur okkar í bakvarðastöðuna. Við lentum í miklum vandræðum í fyrra með jafnvægið í liðinu en nú erum við með tvo góða leikmenn í hverri stöðu sem ætti að laga jafnvægið í liðinu.“

Þá staðfesti hann að félagið væri ekki hætt á leikmannamarkaðnum, enn ætti eftir að bæta við framherja og væri þar um að ræða nafn sem ekki hefur verið nefnt í miðlum erlendis. Ásamt Darmian hafa Memphis Depay, Morgan Schneiderlin og Bastian Schweinsteiger gengið til liðs við Manchester United í sumar.