Thierry Henry og brot úr sögu ensku úrvalsdeildarinnar í skemmtilegri auglýsingu | Myndband

Sky Sports sjónvarpsstöðin er byrjuð að hita upp fyrir komandi tímabil í ensku úrvalsdeildinni sem nálgast óðum enda eru fyrstu leikirnir 8. Ágúst eða eftir aðeins 23 daga.

Til að koma knattspyrnuáhugafólki aftur í gírinn og byggja upp spennu fyrir tímabilið fékk Sky Sports frönsku goðsögnina Thierry Henry til að leika í auglýsingu fyrir ensku úrvalsdeildina.

Thierry Henry ferðast þar í tíma á milli margra af eftirminnilegustu stundanna í sögu ensku úrvalsdeildarinnar frá því að hún var stofnuð haustið 1992.

Henry er settur á skemmtilegan hátt inn í myndbrot sem knattspyrnuáhugamenn verða eflaust aldrei leiðir á að horfa á aftur og aftur.

Sky Sports sýnir stórleikina í ensku úrvalsdeildinni en Stöð 2 Sport 2 auk sportstöðva 365 miðla munu sýna alla leiki ensku úrvalsdeildarinnar beint í vetur.

Hér fyrir neðan má sjá þessa skemmtilegu auglýsingu en við verðum samt að vara úrvalsdeildarfíkla við því að það gæti orðið erfitt að bíða eftir fyrsta leik eftir að hafa horft á þetta gæsahúða-myndband.