Zlatan: Ég skil ekki frönsku

Zlatan Ibrahimovic, framherji Paris Saint-Germain, segist ekki hafa miklar áhyggjur af gagnrýni stuðningsmanna liðsins þar sem hann skilur ekki frönsku.

Þessi 34 ára gamla ofurstjarna hefur verið gagnrýndur harkalega í Frakklandi undanfarið fyrir daufa frammistöðu og bað Laurent Blanc, þjálfari liðsins, hann opinberlega að rífa sig í gang eftir markalausa jafnteflið gegn Real Madrid í Meistaradeildinni.

Zlatan skoraði þó eitt mark og lagði upp annað fyrir Edison Cavani í frönsku 1. deildinni um helgina þegar PSG vann Saint-Étienne, 4-1.

Þegar Svíinn var tekinn af velli á 70. mínútu stakk hann út úr sér tungunni með ögrandi hætti beint í myndavélarnar.

Hann hélt svo áfram að vera með stæla þegar hann ræddi við blaðamenn eftir leikinn og svaraði með kaldhæðni.

„Það var gott að vinna eftir tapið gegn Real Madrid. Töpuðum við ekki þeim leik? Það leit þannig út,“ sagði Zlatan sem vildi meina að liðið var gagnrýnt of mikið fyrir frammistöðuna í þeim leik.

Beðinn um að svara gagnrýni í sinn garð svaraði Svíinn: „Vandamálið er að ég skil ekki frönsku þannig sú gagnrýni skiptir mig engu máli.“