Hetja Chile: Það fór allt inn á æfingum fyrir leikinn

„Ég æfði skot á laugardaginn og hvert einasta þeirra fór inn. Ég var fullur sjálfstrausts í leiknum,“ sagði Eduardo Vargas, hetja Chile í 2-1 sigrinum á Perú í undanúrslitum Suður-Ameríkukeppninnar í fótbolta í nótt.

Vargas skoraði bæði mörk Chile en það síðara var sérlega fallegt; þrumuskot af um 25 metra færi sem Pedro Gallese, markvörður Perú, réði ekki við.

Vargas, sem lék sem lánsmaður með QPR á síðasta tímabili, hefur átt við hnémeiðsli að stríða en sagði að þau hefðu ekki truflað sig í gær.

„Það koma kaflar þar sem mér er illt í hnénu en guði sé lof fann ég ekkert fyrir þessu í leiknum og gat haldið áfram að spila.“

Vargas kom Chile yfir á 41. mínútu en 20 mínútum áður fékk Carlos Zambrano, miðvörður Perú, að líta rauða spjaldið.

Jorge Sampaoli, þjálfari Chile, gerði tvöfalda skiptingu í hálfleik, tók Miiko Albornoz og Marcelo Díaz af velli og setti Eugenio Mena og David Pizzaro inn á í þeirra stað. Þjálfarinn var ánægður með hvernig þessar breytingar tókust til.

„Við vildum gera áherslubreytingar sem myndu hjálpa okkur að nýta liðsmuninn til hins ítrasta í seinni hálfleik.

„Pizzaro jók hraðann í spilinu með góðum sendingum,“ sagði Sampaoli en þrátt fyrir þessar breytingar náði Perú að jafna metin á 60. mínútum þegar Gary Medel setti boltann í eigið mark.

Þremur mínútum síðar skoraði Vargas sigurmarkið sem skaut Chile-mönnum áfram í úrslitaleikinn, í fyrsta sinn síðan 1987.

Chile mætir sigurvegaranum úr leik Argentínu og Paragvæ í úrslitaleik keppninnar laugardaginn 4. júlí næstkomandi.