Gengi Liverpool kemur mér ekki á óvart

Stórleikur helgarinnar í enska boltanum er í hádeginu í dag þegar Liverpool tekur á móti Chelsea.

Chelsea situr í toppsæti deildarinnar með 26 stig og hefur ekki enn tapað í fyrstu tíu leikjum sínum í deildinni. Liverpool er ekki alveg á sömu siglingu og situr í sjöunda sæti deildarinnar með 14 stig. Ekki sá árangur sem stefnt var að. Það myndi aftur á móti gefa liðinu mikið ef því tækist að skella Chelsea í dag.

Það eru aftur á móti ekki góð tíðindi fyrir Liverpool að framherjinn Diego Costa er klár í slaginn á nýjan leik fyrir Chelsea og mun líklega byrja leikinn.

Jose Mourinho, stjóri Chelsea, var spurður út í gengi Liverpool á blaðamannafundi í gær.

„Staða liðsins kemur mér ekki á óvart. Það er ekkert í þessari deild sem kemur mér á óvart. Allir leikir eru erfiðir og aldrei hægt að vita hvenær lið tapa stigum. Ég lít svo á að Liverpool sé að berjast um titilinn rétt eins og við,“ sagði Mourinho og bætir við að það sé alltaf erfitt að spila á Anfield.

„Áhorfendur hérna geta alltaf haft áhrif á gang mála. Mér finnst gaman að spila hérna en sumir upplifa andrúmsloftið á neikvæðan hátt.“