QPR og Man City skildu jöfn í ótrúlegum leik | Myndbönd

Það er óhætt að segja að framherjarnir Charlie Austin og Sergio Aguero hafi verið í aðalhlutverkum þegar nýliðar QPR og Englandsmeistarar Manchester City skildu jöfn 2-2 í frábærum leik á Loftus Road.

Austin kom QPR yfir á 21. mínútu eftir að hafa fengið boltann frá Síle-manninum Mauricio Isla, en nokkrum mínútum áður hafði Mike Dean, dómari leiksins, dæmt tvö mörk af Austin.

Þá var komið að Aguero, en hann jafnaði metin á 32. mínútu eftir frábært einstaklingsframtak. Einhver áhöld voru um hvort markið hefði átt að standa, en Argentínumaðurinn virtist leggja boltann fyrir sig með höndinni.

Fjörið hélt áfram í seinni hálfleik, en áhorfendur þurftu þó að bíða fram á 76. mínútu eftir næsta marki. Það gerði Martin Demichelis, sem stangaði boltann í eigið mark eftir fyrirgjöf frá Austin.

Englandsmeistararnir gáfu í kjölfarið og QPR-menn björguðu tvisvar á línu með skömmu millibili. Þeir komu þó engum vörnum við þegar Aguero skoraði sitt annað mark og jafnaði metin. Þetta var 12. mark Argentínumannsins í deildinni í vetur.

Fleiri urðu mörkin ekki og liðin skiptu stigunum á milli sín. City er nú átta stigum á eftir Chelsea í 3. sæti deildarinnar. QPR er hins vegar enn í fallsæti með átta stig.

Charlie Austin 1-0 Sergio Aguero 1-1 Martin Demichelis 2-1 Aguero 2-2