Rooney vill verða fyrirliði Manchester United

Wayne Rooney, framherji Manchester United, vonast til þess að hann verði gerður að nýjum fyrirliða liðsins en sögusagnir hafa verið uppi um að Robin van Persie fái bandið næstur.

Nemanja Vidic kvaddi félagið eftir átta ára dvöl á Old Trafford fyrr í mánuðinum en hann tók við bandinu þegar Gary Neville lagði skóna á hilluna. Þegar Louis van Gaal mætir til starfa eftir HM þarf hann því að velja nýjan fyrirliða.

„Ég hef áhuga á að verða fyrirliði. Ég tel mig tilbúinn en þetta er undir nýja stjóranum komið,“ segir Rooney.

„Ég hef verið fyrirliði nokkrum sinnum og að verða varanlegur fyrirliði liðsins yrði frábært,“ segir hann en Van Gaal gerði Robin van Persie að fyrirliða hollenska landsliðsins.

„Robin er fyrirliði síns lands og hann hefur verið fyrirliði Arsenal. Ef hann fær tækifærið er ég viss um að hann mun standa sig,“ segir Rooney.