Hasselbaink vill þjálfa enskt félag

Jimmy Floyd Hasselbaink og Eiður Smári Guðjohnsen voru eitt sinn eitt skæðasta framherjapar ensku úrvalsdeildarinnar. Hasselbaink hefur verið í miklum metum hjá mörgum Íslendingum frá því hann lék með Chelsea.

Hann er nú að reyna fyrir sér sem þjálfari. Hann var fyrst hjá Nott. Forest og entist þar í eitt og hálft ár. Þá fór hann til belgíska félagsins Antwerpen sem vill halda honum en Hollendingurinn hefur ekki áhuga á því.

"Ég afþakkaði tilboðið þeirra. Ég er opinn fyrir ýmsu en draumurinn er að finna starf á Englandi," sagði Hasselbaink.

"Ég bý enn á Englandi og konan mín er ensk. Krakkarnir mínir eru þar af leiðandi í skóla hérna þannig að eðlilega vil ég starfa á Englandi."