Hélt að Moyes myndi drepa mig

Maðurinn sem lenti í útistöðum við David Moyes, fyrrum stjóra Man. Utd, á dögunum ber sig ekki vel og segist hafa óttast um líf sitt.

Moyes missti stjórn á skapi sínu á vínbar eftir að hafa mátt þola mikla stríðni og almenn leiðindi frá fólki á staðnum.

"Hann greip um hálsinn á mér og lamdi flösku aftan á höfuðið á mér. Ég steinlá á gólfinu. Ég hélt ég myndi deyja," sagði Joshua Gillibrand um árás Moyes á sig.

Gillibrand var ekki sá eini sem sendi Moyes sneiðar á barnum. Á endanum sprakk Moyes og var algjörlega stjórnlaus að sögn vitna.

Lögreglan hefur ekki handtekið neinn vegna málsins en mun kalla á Moyes í skýrslutöku.