David Luiz á leiðinni til PSG

Chelsea hefur staðfest á heimasíðu sinni að félagið sé búið að samþykkja tilboð Paris Saint-Germain í brasilíska varnarmanninn David Luiz.

Luiz lék 81 leik fyrir Chelsea í ensku úrvalsdeildinni og skoraði sex mörk í þeim, mörg hver stórkostleg. Hann hefur hinsvegar verið harðlega gagnrýndur fyrir varnarleik sinn og kom upphæðin sem PSG býður í hann mörgum á óvart.

Talið er að PSG greiði 50 milljónir punda fyrir Luiz en það er tvöföldun á verði hans frá því að hann gekk til liðs við Chelsea frá Benfica í janúar 2011.

Luiz er í brasilíska landsliðshópnum fyrir Heimsmeistaramótið sem er framundan en hann mun hefja viðræður við PSG á næstu dögum. Talið er að hann muni fara í læknisskoðun í æfingarbúðum brasilíska landsliðsins en breski miðillinn Daily Mail telur að hann hafi nú þegar gengist í gegn um læknisskoðun og samþykkt samning Parísarmanna.