Stórsigur Sunderland

Gus Poyet og lærisveinar hans í Sunderland unnu gríðarlega mikilvægan sigur á Cardiff City í miklum fallslag í fyrsta leik dagsins í ensku úrvalsdeildinni.

Connor Wickham kom Sunderland yfir á 26. mínútu þegar hann skallaði fyrirgjöf Sebastians Larsson í netið, en þetta var fjórða marks hans í síðustu þremur leikjum.

Wickham var svo aftur í sviðsljósinu á lokamínútu fyrri hálfleiks þegar Juan Cala, varnarmaður Cardiff, togaði sóknarmanninn niður þegar hann var kominn einn í gegn. Vítaspyrna var dæmd og Cala fékk að líta rauða spjaldið. Ítalinn Fabio Borini skoraði úr spyrnunni og tvöfaldaði forskot Svörtu kattanna.

Borini lagði upp þriðja mark Sunderland fyrir landa sinn Emanuele Giaccherini þegar 13 mínútur voru eftir af leiknum og Wickham skoraði svo sitt annað mark og fjórða mark Sunderland með skalla eftir hornspyrnu.

Fleiri urðu mörkin ekki og Sunderland fagnaði því lífsnauðsynlegum sigri í botnbaráttunni. Með sigrinum komst liðið úr fallsæti og upp í það 17. Sunderland er nú með 32 stig, jafnmörg og Norwich, en með betri markatölu. Poyet og félagar eiga auk þess leik inni.

Eftir tapið er Cardiff í 20. og neðsta sæti deildarinnar, tveimur stigum á eftir Sunderland. Aron Einar Gunnarsson var ekki í leikmannahópi Cardiff.