Suárez leikmaður ársins í ensku úrvalsdeildinni

Luis Suárez, framherji Liverpool, var í kvöld kjörinn leikmaður ársins í ensku úrvalsdeildinni á árlegu hófi leikmannasamtakanna þar í landi.

Leikmenn deildarinnar eru þeir sem kjósa en einnig komu til greina Daniel Sturridge, samherji hans hjá Liverpool, Steven Gerrard, fyrirliði Liverpool, Adam Lallana, leikmaður Southampton, Eden Hazard hjá Chelsea og Yaya Touré, leikmaður Manchester City.

Suárez hefur farið gjörsamlega hamförum á tímabilinu og er búinn að skora 30 mörk í deildinni en hann getur enn bætt markamet Alans Shearers yfir flest mörk á einu tímabili.

Eden Hazard, leikmaður Chelsea, var kjörinn besti ungi leikmaðurinn en hann hefur verið virkilega öflugur á leiktíðinni.

Liverpool-mennirnir þrír sem komu til greina sem leikmenn ársins eru allir í liði ársins ásamt Hazard, Touré og Lallana en lið ársins í ensku úrvalsdeildinni lítur annars svona út:

Petr Cech; Seamus Coleman, Gary Cahill, Vincent Kompany, Luke Shaw; Adam Lallana, Steven Gerrard, Yaya Touré, Eden Hazard; Daniel Sturridge, Luis Suárez.

Suarez og félagar biðu lægri hlut í dag gegn Chelsea á Anfield en mörkin úr leiknum má sjá í fréttinni hér að neðan.