Fabianski varði Arsenal í bikarúrslit

Arsenal er komið í úrslit ensku bikarkeppninnar eftir dramatískan sigur á bikarmeisturum Wigan eftir vítaspyrnukeppni. Draumur Arsenal um langþráðan titil lifir því enn.

Fyrri hálfleikur var tilþrifalítill og markalaust er liðin gengu til búningsherbergja.

Fjörið byrjaði síðan í síðari hálfleik. Wigan komst yfir tæpum hálftíma fyrir leikslok er Jordi Gomez skoraði úr víti eftir að Mertesacker hafði brotið af sér.

Arsenal setti mikla pressu á Wigan tíu mínútum fyrir leikslok. Á einni mínútu átti liðið skot í stöng og síðan björguðu varnarmenn Wigan á línu.

Mikil pressa og eitthvað varð undan að láta. Það gerði það nokkrum sekúndum síðar. Þá bætti Mertesacker fyrir mistökin með því að jafna leikinn. Skalli inn í markteig. Gat ekki annað en skorað.

Ekki voru fleiri mörk skoruð í venjulegum leiktíma og því varð að framlengja leikinn. Þar réð þreytan ríkjum og ekkert var skorað þar. Varð því að grípa til vítaspyrnukeppni.

Wigan byrjaði í vítakeppninni. Gary Caldwell tók spyrnuna en hann lét Fabianski verja frá sér. Þá var komið að Mikel Arteta og hann skoraði örugglega.

Það var pressa á Jack Collison í annarri spyrnu Wigan. Hann lét líka verja frá sér. Fabianski að lesa þá eins og opna bók. Kim Källström steig næstur á punktinn og hann skoraði örugglega.

Beausejour náði svo loksins að skora fyrir Wigan. 2-1 er Giroud mætti á punktinn. Hann skoraði örugglega.

James McArthur skoraði svo örugglega fyrir Wigan. Ekki búið. Þá færðist pressan yfir á Cazorla sem skoraði örugglega og skaut Arsenal þar með í úrslitaleikinn.