Þetta hefur verið skrautlegt

Það hefur gengið á ýmsu hjá nýliðum Cardiff í ensku úrvalsdeildinni í haust. Eftir þokkalega byrjun fór að halla undan fæti og eftir 3-0 tap fyrir Southampton á heimavelli var knattspyrnustjóranum Malky Mackay sagt upp störfum. Það hafði reyndar átt sér langan aðdraganda sem fól meðal annars í sér opinbera rimmu eigandans Vincents Tan við Mackay.

Ole Gunnar Solskjær, stjóri Molde í Noregi og fyrrum stórstjarna Manchester United, var ráðinn í stað Mackay í fyrradag. Tan og félagar vonast til að sú ráðning dugi til að lægja óánægjuöldurnar í kringum félagið og gleðja stuðningsmennina á ný. Mehmet Dalman, stjórnarformaður félagsins, gekk svo langt í gær að biðjast formlega afsökunar á þeim skrípaleik sem hafði átt sér stað utan vallar síðustu daga og vikur.

„Þetta hefur verið ansi skrautlegt,“ sagði Aron Einar Gunnarsson, landsliðsfyrirliði Íslands og leikmaður Cardiff, í samtali við Fréttablaðið í gær. „Hér hefur ríkt algjör ringulreið og verður að segjast að það hefur verið lélega að þessu staðið öllu saman. Við leikmenn viljum fyrst og fremst einbeita okkur að fótbolta og vonandi náum við að snúa genginu okkur í hag nú þegar búið er að ráða nýjan stjóra,“ bætir Aron Einar við.

Cardiff er í sautjánda sæti ensku úrvalsdeildarinnar og einu stigi frá fallsæti. Fram undan eru erfiðir leikir í deildinni en í dag fá lærisveinar Solskjærs tækifæri til að takast á við nýja áskorun er liðið mætir Newcastle í ensku bikarkeppninni. Aron Einar fékk að vita í gær að hann verður í byrjunarliði Cardiff í Newcastle í dag.

„Ég er mjög ánægður með það enda vil ég spila hverja einustu mínútu,“ segir Aron sem hefur mátt sætta sig við þó nokkra bekkjarsetu eftir að hafa verið í stóru hlutverki í upphafi tímabilsins.

„Ég viðurkenni fúslega að sjálfstraustið hefur verið meira. En svona hefur þetta verið og ég hef reynt að gera mitt besta til að komast aftur í liðið,“ segir Aron Einar sem ræddi stuttlega við Solskjær í gær.

„Honum líst vel á íslenska knattspyrnumenn og talaði vel um árangur landsliðsins. Það verður svo bara að koma í ljós hvernig leikmenn hann vill hafa í sínu liði. Ég er ekkert að stressa mig á því og verð sáttur ef ég fæ að spila.“

Aron Einar segir að Solskjær hafi komið með einföld skilaboð inn í leikmannahópinn.

„Hann vill spila skemmtilegan fótbolta og það finnst mér jákvætt. Við erum með flotta leikmenn og eigum að vera með fleiri stig en taflan sýnir. Það er því ekkert annað að gera en að horfa fram á veginn jákvæðum augum.“