Merson: Tottenham henti hundrað milljónum punda út um gluggann

Paul Merson, fyrrverandi leikmaður Arsenal og núverandi knattspyrnusérfræðingur á Sky Sports, gagnrýndi forráðamenn Tottenham fyrir hvernig félagið fór með peningana sem það fékk í sölunni á Gareth Bale.

Gylfi Þór Sigurðsson horfði upp á André Villas-Boas og forráðamenn Tottenham kaupa hvern miðjumanninn á fætur öðrum í haust og allir þeirra hafa ollið vonbrigðum að mati Paul Merson.

„Tottenham er milljón mílum frá sæti í Meistaradeildinni og það er ekki Tim Shearwood að kenna. Ástæðan er fólkið á bak við tjöldin og þeir sem náðu í þessa leikmenn hvort sem það er stjórnarformaðurinn eða einhverjir sem vinna með honum," sagði Paul Merson á Skysports eftir 0-1 tap Tottenham á móti Arsenal á White Hart Lane í gær.

„Leikmennirnir sem þeir keyptu eru langt frá því að vera nógu góðir. Félagið er búið að eyða hundrað milljónum punda í leikmenn og kemst ekki bara í hóp fjögurra efstu. Það sem alvarlega er að markatala þeirra á móti bestu liðunum er 2-23 og þeir hafa tapað illa í flestum leikjum sínum við efstu liðin," sagði Paul Merson,

„Hvar fengu þeir þessa leikmenn eiginlega því þeir eru ekki nógu góðir. Það er ekki einn þeirra sem hefur staðið sig. Það er ekki hægt að segja að einn af þessum leikmönnum sem þeir eyddu hundrað milljónum í fái 7 af 10 í einkunn á þessu tímabili. Þeir myndi í mesta lagi fá 4 eða 5," sagði Merson.

Tottenham keypti Roberto Soldado, Christian Eriksen, Erik Lamela, Étienne Capoue, Vlad Chiriches, Nacer Chadli og Paulinho í haust þar af Eriksen og Lamela á lokadegi félagsskiptagluggans.

Tottenham er í 5. sæti ensku úrvalsdeildarinnar nú sjö stigum á eftir Manchester City sem er eins og er í 4. sæti. City-liðið á hinsvegar þrjá leiki inni á Tottenham og því er Tottenham-liðið enn lengra frá Meistaradeildarsætinu.