Rose í aðalhlutverki

Danny Rose var heldur betur í aðalhlutverki þegar Tottenham Hotspur vann 1-0 sigur á Stoke á útivelli í ensku úrvalsdeildinni í dag.

Rose skoraði eina mark leiksins á 33. mínútu með skalla eftir fyrirgjöf frá Emmanuel Adebayor. Rose var síðan aftur í sviðsljósinu í byrjun seinni hálfleiks þegar fyrirliði Stoke City, Ryan Shawcross, fékk sitt annað gula spjald fyrir brot á honum.

Gylfi Þór Sigurðsson kom inn á sem varamaður og lék síðustu 17 mínúturnar fyrir Tottenham.

Tottenham situr enn í 6. sætinu, þremur stigum á eftir Everton. Stoke siglir hins vegar lygnan sjó um miðja deild.