Barkley til Liverpool er bara brandari í augum Martinez

Liverpool og Everton eru bæði á miklu skriði í ensku úrvalsdeildinni og gætu bæði spilað í Meistaradeildinni á næsta tímabili. Roberto Martinez, knattspyrnustjóri Everton, hlær bara af þeim sögusögnum um að Liverpool sé að fara að reyna að kaupa efnilegasta leikmenn Everton-liðsins.

The Daily Star birti frétt í morgun um að Liverpool væri að undirbúa 38 milljón punda tilboð í hinn 20 ára gamla miðjumann Ross Barkley. Það fylgir sögunni að Brendan Rodgers, knattspyrnustjóri Liverpool, sé mikill aðdáandi Barkley.

„Samkvæmt vangaveltum í fjölmiðlum þá höfum við þegar hafnað 50 milljón punda tilboði í Ross og af hverju ættum við þá að sætta okkur við 38 milljónir," sagði Roberto Martinez í hæðnistón á blaðamannafundi fyrir leik á móti Crystal Palace á Goodison Park á morgun.

„Hvað finnst mér um þessar vangaveltur. Mér finnst þær bara skemmtilegar," svaraði Martinez brosandi.

Ross Barkley hefur skorað 5 mörk í 30 leikjum með Everton í ensku úrvalsdeildinni á þessu tímabili en hann lék vara 7 leiki í úrvalsdeildinni undir stjórn David Moyes á síðustu leiktíð.