Sunderland komst upp úr fallsæti

Sunderland fór góða ferð til Lundúna í kvöld þar sem liðið fékk öll stigin í leik gegn Crystal Palace.

Sunderland komst yfir í fyrri hálfleik með laglegu skallamarki Steven Fletcher og þannig stóðu leikar í hálfleik. Það var ekkert sérstaklega mikið að frétta í leik Palace er Wes Brown ákvað að bjóða þeim aftur inn í leikinn.

Hann skoraði þá ævintýralegt sjálfsmark. Einhvern veginn tókst honum samt að skjóta boltanum í stöngina og inn. Markið má sjá hér að neðan.

Þetta var sjötta sjálfsmark Brown í ensku úrvalsdeildinni. Richard Dunne á metið sem er tíu sjálfsmörk. Jamie Carragher skoraði sjö.

Brown gat aftur á móti andað léttar þegar félagi hans, Jordi Gomez, kom Sunderland aftur yfir í leiknum með góðu skoti.

Mile Jedinak, leikmaður Palace, fékk svo rautt spjald skömmu fyrir leikslok er hann fékk sína aðra áminningu í leiknum. Einum færri átti Palace ekki möguleika og Fletcher gekk frá leiknum í uppbótartíma.

Sunderland komst upp úr fallsæti með sigrinum en liðið er í 14. sæti. Palace er aftur á móti í 17. sæti.

Sjálfsmark Wes Brown.