Ancelotti hlær að sögusögnum um United

Carlo Ancelotti segir ekkert hæft í þeim orðrómi að hann kunni að taka við Manchester United í sumar.

Ancelotti hló að spurningum um málið á blaðamannafundi Real Madrid í morgun en þangað kom hann síðastliðið sumar. David Moyes var rekinn sem stjóri United fyrr í vikunni og var Ancelotti meðal þeirra sem voru orðaðir við félagið.

„Ég er virkilega ánægður hér,“ sagði Ancelotti. „Ég er það heppinn að ég starfa hjá besta knattspyrnufélagi heims.“

„Ég ber mikla virðingu fyrir Manchester United. Það voru mér vonbrigði að David Moyes hafi hætt en minn staður er hér.“