Pellegrini: Við áttum að fá víti

Manuel Pellegrini, stjóri Man. City, var ósáttur við að fá ekki víti þegar Martin Skrtel kýldi boltann í teignum í uppbótartíma í leik Liverpool og Man. City í dag.

"Það var klárt víti. Við töpuðum samt ekki út af dómaranum. Hann átti fínan leik," sagði Pellegrini.

"Þetta var flottur leikur tveggja liða sem vilja sækja. ´Við áttum meira skilið úr þessum leik og vorum óheppnir. Það var eitt lið á vellinum í síðari hálfleik og við fengum færin til þess að klára þennan leik.

"Þeir spiluðu líka vel og sérstaklega fyrstu 20 mínútur leiksins. Vincent Kompany er venjulega frábær en í dag gerði hann mistök," sagði Pellegrini og talar þar um sigurmark Liverpool sem kom eftir mistök Kompany.

"Ef við vinnum leikina sem við eigum inni verðum við bara stigi á eftir Liverpool sem á enn eftir að spila við Chelsea. Titilbaráttunni er ekki lokið og það á eftir að spila mikinn fótbolta."