Liverpool missti niður 3-0 forystu og kastaði frá sér titlinum - myndband

Manchester City er með pálmann í höndunum í baráttunni um enska meistaratitilinn eftir að Liverpool náði aðeins 3-3 jafntefli á móti Crystal Palace á Selhurst Park í ensku úrvalsdeildinni í kvöld.

Það má sjö öll mörkin í leiknum með því að smella á myndbandið hér fyrir ofan.

Liverpool komst í 3-0 í leiknum og ekki leit út fyrir annað en að stigin þrjú væru í höfn en Liverpool fékk á sig þrjú mörk á lokamínútunum og henti frá sér sigurinn.

Liverpool hefur þar með 81 stig eða einu stigi meira en Manchester City sem á leik inni á móti Aston Villa á miðvikudagskvöldið. City er auk þess með betri markatölu og vantar því í raun fjögur stig út úr síðustu tveimur leikjum sínum til þess að tryggja sér titilinn,  

Joe Allen kom Liverpool í 1-0 með skalla á 18. mínútu eftir hornspyrnu Steven Gerrard en þetta var fyrsta deildarmark Allen fyrir Liverpool-liðið.

Liverpool skoraði síðan tvö mörk á tveimur mínútum í upphafi seinni hálfleiks. Daniel Sturridge skoraði það fyrra á 53. mínútu eftir frábæra sendingu fram völlinn hjá Steven Gerrard en það seinna skoraði Luis Suarez á 55. mínútu eftir samvinnu við Raheem Sterling.

Það leit út fyrir að Liverpool ætlaði að fara að bæta markatölu sína en annað kom á daginn því Crystal Palace skoraði tvö mörk með þriggja mínútna millibili á lokamínútum leiksins.

Það fyrra skoraði Damien Delaney með langskoti sem fór af varnarmanni og inn á 78. mínútu en það síðara skoraði Dwight Gayle eftir skyndisókn á 81. mínútu.

Dwight Gayle jafnaði síðan metin á 88. mínútu og reyndist því heldur betur örlagavaldur Liverpool í baráttunni um enska meistaratitilinn.