Rodgers: Glæpsamlegur varnarleikur

Brendan Rodgers, knattspyrnustjóri Liverpool, horfði upp á sitt lið í kvöld fara úr því á aðeins fimmtán mínútum að vera úr góðri stöðu með að vinna Englandsmeistaratitilinn í fyrsta sinn í 24 ára, í því að hreinlega kasta frá sér titlinum. Liverpool komst í 3-0 á móti Crystal Palace en missti leikinn niður í 3-3 jafntefli.

„Auðvitað var þetta afar svekkjandi. Við vorum frábærir í 75 mínútur. Við skoruðum þrjú mörk og bjuggum til fjölda færa til viðbótar. Síðan fengum við á okkur mark þegar tólf mínútur voru eftir og liðið þarf að klára svona stöðu miklu betur," sagði Brendan Rodgers við BBC.

„Það gengur bara ekki að koma hingað á móti mjög góðu liði og verjast eins illa og við gerðum. Þetta var hreinlega glæpsamlegt," sagði Rodgers harðorður.

„Það eiga allir sökina, liðið, þjálfarinn, stjórinn og hreinlega allir. Við vinnum og töpum saman. Stuðningsmennirnir okkar voru frábærir og þeir hjálpuðu okkur að ná forystunni. Við verðum bara að halda áfram," sagði Rodgers.

„Það er samt enginn vafi á því lengur að Manchester City mun vinna deildina. Við urðum að vinna þennan leik til að setja einhverja pressu á þá. Ég býst við því að City-liðið vinni báða heimaleikina sem liðið á eftir," sagði Rodgers.