Kári og félagar í Championship-deildina

Kári Árnason og félagar hans í Rotherham unnu sér í dag þátttökurétt í Championship-deildinni á næsta tímabili.

Rotherham og Leyton Orient mættust í úrslitaleik á Wembley um laust sæti í næstefstu deild að ári. Moses Odubajo kom Orient yfir eftir 34 mínútna leik og Dean Cox tvöfaldaði forystuna fimm mínútum seinna.

Alex Revell minnkaði muninn á 55. mínútu og  hann var síðan aftur á ferðinni fimm mínútum síðar þegar hann jafnaði leikinn í 2-2. Fleiri urðu mörkin ekki og því þurfti að grípa til framlengingar.

Hvorugu liðinu tókst að skora í framlengingunni og því var ljóst að úrslitin myndu ráðast í vítaspyrnukeppni.

Þar reyndist markvörðurinn Adam Collin hetja Rotherham, en hann varði tvær síðustu spyrnur Orient-manna og tryggði sínum mönnum sæti í Championship-deildinni að ári.

Frábær árangur hjá Kára og félögum, en Rotherham er nú búið að fara upp um tvær deildir á tveimur árum.

Wolves og Brentford höfðu áður tryggt sér sæti í Championship-deildinni.