Valdi fimm konur í ríkisstjórn

Shinzo Abe, forsætisráðherra Japans, hefur valið fimm konur í átján manna ríkisstjórn sína. Þar með hefur hann jafnað met Junichiro Koizumi, fyrrverandi forsætisráðherra, frá árinu 2001, hvað varðar fjölda kvenna í ríkisstjórn.

Margar vel menntaðar konur eru búsettar í Japan en þær hafa lengi kvartað yfir þeim hindrunum sem eru í vegi þeirra á vinnumarkaðnum. Þær segjast ekki vera teknar alvarlega í vinnunni, fá ekki jafnhá laun fyrir jafnmikla vinnu og eiga erfitt með að fá pössun fyrir börnin, auk þess sem eiginmenn þeirra eða kærastar veita þeim ekki nægilegan stuðning.

Tíu prósent þingmanna í Japan eru konur og aðeins 3,9 prósent stjórnarmanna í japönskum fyrirtækjum eru konur. Abe sett sér það markmið að þrjátíu prósent stjórnarmanna í fyrirtækjum, bæði í einka- og opinbera geiranum verði konur fyrir árið 2020.



„Að sjá fyrir okkur samfélag þar sem konur geta fengið að njóta sín er áskorun sem ríkisstjórn okkar ætlar að takast á við,“ sagði Abe.