Gylfi: Naut þess að spila fyrir Sherwood

Gylfi Þór Sigurðsson er í viðtali í nýjasta hefti tímaritsins FourFourTwo þar sem hann ræðir meðal annars um tíma sinn hjá Tottenham  undir stjórn Tim Sherwood.

Sherwood tók við stjórastöðunni hjá Tottenham eftir að Andre Villas-Boas var rekinn frá liðinu í desember í fyrra. Hann var þó sjálfur rekinn aðeins fimm mánuðum síðar.

Sjálfur fór Gylfi frá Tottenham í sumar og gekk í raðir Swansea þar sem hann hefur blómstrað á upphafsmánuðum tímabilsins í Englandi. „Hann er virkilega góður knattspyrnustjóri og ég naut þess mjög að spila fyrir hann,“ sagði Gylfi um Sherwood.

„Það er synd að hann hafi ekki fengið lengri tíma. Miðað við hvernig hann talar um félagið og þykir annt um það er ég viss um að hann hefði staðið sig vel.“

„Vonandi kemst stöðugleiki á félagið á ný og það náð árnagri á næstu árum,“ sagði Gylfi enn fremur.