Íslendingur vann tæpar 160 þúsund krónur á biti Suarez

„Ég hef alltaf getað treyst á minn mann, Suarez,“ segir ónefndur Íslendingur sem hagnaðist ágætlega á umdeildu biti knattspyrnumannsins Suarez.

Fátt er meira rætt innan fótboltaheimsins, og reyndar utan hans einnig, atvik gærkvöldsins, úr leik Ítala og Úrúgvæja á HM í Brasilíu í gærkvöldi þegar stjarna þeirra síðarnefndu, Lúis Súarez beit ítalska varnarmanninn Giorgio Chiellini í öxlina. Súarez vill gera lítið úr atvikinu, FIFA á eftir að fjalla um málið, en Betsson hefur úrskurðað í málinu:

Þetta var bit og hafa fréttir um frumleg veðmál þess efnis að Suarez myndi bíta, farið um heimspressuna.

Og þannig vill til að einn þeirra í veröldinni sem lét sér detta í hug að veðja á þetta er Íslendingur. Hann vill ekki koma fram undir nafni en var til í að svara Vísi fáeinum spurningum, og sú sem efst er á baugi hlýtur að vera: Hvernig í ósköpunum datt þér þetta í hug?

Fór að hlæja

„Það er reyndar mjög einfalt. Ég er ekki mikill veðmálamaður en átti nokkrar evrur inni á Betsson-reikningi. Var þarna inni og sá lið sem heitir „fyndin veðmál“. Þetta var hæsti stuðullinn og ég setti allt sem ég átti á þetta. Ég var búinn að steingleyma þessu þangað til í gær. Þá mundi ég eftir þessu veðmáli. Þá eiginlega, jahh, fór ég að hlæja. Þetta er skondið.“

Þetta er vissulega skondið. Og ánægjulegt fyrir okkar mann sem setti tæpar sex evrur á það að Suarez myndi bíta, og hann beit og stuðullinn á að það myndi henda var 175, þannig að vinningurinn var uppá rúmar þúsund evrur sem leggur sig á um 156 þúsund krónur.

Verðlaunahafinn segist spurður halda með Liverpool og þó hann standi með Suarez, þá liggi fyrir, og um það hefur Betsson úrskurðað, að þetta sé bit, þegar allt kemur til alls.

Betsson-veðmálafyrirtækið bauð nefnilega upp á möguleikann á því að veðja á það að Luis Suárez biti mótherja á HM og það voru alls 167 manns tilbúnir að setja pening á það. Líkurnar voru 175 á móti einum. Betsson hefur aðsetur á Möltu.