Suarez um mistök Gerrard: Veit ekki hvort ég hefði getað haldið áfram

Luis Suarez segir frá tapi Liverpool gegn Chelsea á síðustu leiktíð í væntanlegri ævisögu sinni. Chelsea vann leikinn, 2-0, á Anfield og átti stóran þátt í því að Liverpool gaf eftir í titilbaráttunni á lokaspretti tímabilsins.

Steven Gerrard gerði sem kunnugt er mistök í leiknum er hann rann til og færði Demba Ba boltann á silfurfati. Ba skoraði og kom Chelsea yfir.

„Ég veit ekki hvort ég hefði getað haldið áfram ef ég hefði verið í sporum Stevie,“ segir Suarez í bókinni. „Þetta hlýtur að hafa verið mjög, mjög erfitt.“

„Það var búið að tala mikið um hann síðustu vikur á undan og væntingarnar voru svo miklar. Umræðan snerist um að hann væri á góðri leið með að leiða Liverpool, félagið sitt, að fyrsta titli sínum í meira en 20 ár og það á 25 ára afmælisári Hillsborough-slyssins, þar sem hann missti frænda sinn.“

„Hann er fyrirliðinn, fyrrum unglingaliðsmaður sem hefur aldrei spilað fyrir annað félag. Fæddur og uppalinn „Scouser“ og hann var sá sem gerði mistökin.“

„Ég er sannfærður um að Chelsea hefði ekki skorað annað mark hefði þetta mark ekki litið dagsins ljós. Þegar maður lendir marki undir gegn Chelsea er næstum ómögulegt að koma til baka.“

Suarez yfirgaf herbúðir Liverpool í sumar og gekk í raðir Barcelona.