Kári og félagar í ágætri stöðu þrátt fyrir draumamark - Myndband

Kári Árnason og félagar í Rotherham United eru í ágætri stöðu eftir fyrri leikinn gegn Preston North End í umspili um laust sæti í Championship deildinni í ensku knattspyrnunni. Liðin skildu jöfn 1-1 á heimavelli Preston í dag.

Kári Árnason lék að venju allan leikinn fyrir Rotherham sem komst yfir á 21. mínútu þegar Alex Revell skoraði.

Joe Garner jafnaði metin á fjórðu mínútu seinni hálfleiks og þar við sat. Seinni leikur liðanna fer fram á fimmtudaginn.

Rotherham United hafnaði í fjórða sæti í deildinni og Preston North End fimmta.