Hodgson: Rooney veit að heimurinn fylgist með honum

Roy Hodgson, landsliðsþjálfari Brasilíu, segist meðvitaður um að augu allra verða á WayneRooney, framherja enska landsliðsins, á HM og segir hann vera að gera allt til að vera í sem besta standi í sumar.

Rooney var rekinn af velli í frægum leik í átta liða úrslitum gegn Portúgal á HM 2006 og mætti svo í engu standi eftir meiðsli á HM í Suður-Afríku og spilaði ekki vel. Nú mætti hann fyrr til Portúgal þar sem enska landsliðið er í æfingabúðum til að vera klár.

„Rooney veit hversu góður leikmaður hann er. Hann veit að augu allra á Englandi og í raun að heimurinn allur verður að fylgjast með honum. Hann mun gera allt til að sýna sínar bestu hliðar,“ segir Hodgson.

„Rooney eyddi frívikunni sinni hér í Portúgal og æfði aukalega. Hann sagði við mig að þegar ég myndi mæta síðasta mánudag yrði hann 100 prósent klár frá fyrsta degi.“

Framherjinn fékk þó ekki að vera með á æfingu á miðvikudaginn sem honum líkaði ekki.

„Hann var frekar svekktur vegna þess að ég leyfði honum ekki að æfa. Við vorum að skjóta mikið á markið og ég vildi passa upp á lærið á honum. Ef hann fengi að ráða hefði hann tekið jafnmörg skot og allir aðrir,“ segir Roy Hodgson.