Robson telur að van Persie verði næsti fyrirliði

Bryan Robson, fyrrverandi leikmaður Manchester United, gerir ráð fyrir að Louis van Gaal muni útnefna landa sinn, Robin van Persie, sem næsta fyrirliða liðsins.

"Robin var fyrirliði hjá hollenska landsliðinu, svo þetta liggur í augum uppi," sagði Robson, sem lék með Manchester United í 13 ár og var lengi vel fyrirliði liðsins.

"Það kæmi mér mikið á óvart ef van Persie yrði ekki fyrir valinu," sagði Robson ennfremur, en hann er bjartsýnn fyrir komandi tímabili.

"Van Gaal hefur unnið titla alls staðar þar sem hann hefur verið og vonandi gerir hann það líka hjá Manchester United," sagði Robson.

"Holland spilaði vel á HM. Þeir voru vel skipulagðir og mér fannst þeir óheppnir í undanúrslitunum. Að mínu mati voru Hollendingar sterkari aðilinn gegn Argentínu og þeir gátu farið alla leið."

Gengi Manchester United á síðustu leiktíð undir stjórn Davids Moyes var ekki gott, en Robson segir að það muni hvetja leikmenn liðsins til dáða á næstu leiktíð.

"Stuðningsmennirnir urðu fyrir miklum vonbrigðum á síðasta tímabili, en engir urðu fyrir meiri vonbrigðum en leikmennirnir.

"Ég þekki þá. Þeir hafa unnið enska meistaratitilinn, Meistaradeild Evrópu, og þeir eru allir vonsviknir með gengi síðasta tímabils. Leikmennirnir vilja koma til baka og sýna fólki að þeir séu toppleikmenn og geti unnið titla," sagði Robson að lokum.