Lambert: Dóttir mín getur kýlt fastar

Paul Lambert, stjóri Aston Villa, skýtur föstum skotum að Ryan Mason, leikmanni Tottenham, eftir leik liðanna í dag. Christian Benteke, framherji Villa, fékk rautt spjald fyrir að kítast í Mason.

„Þú getur ekki varið það sem Benteke gerði, en þetta var ekkert Mike Tyson högg," sagði Lambert við BBC og hélt áfram: „Dóttin mín getur kýlt fastar."

„Mér fannst við vera frábærir í dag. Við töpuðum, en rauða spjaldið breytti leiknum. Það var svo margt jákvætt í dag, en eitt neikvætt."

Tapið var sjötta tap Villa í röð sem er versta gengi liðsins frá því 1967.

„Við vorum að spila gegn góðu liði, en mér fannst við líklegri. Frammistöðulega séð hefði ég ekki getað beðið um meira," sem hrósaði framherjanum Christian Benteke að lokum.

„Benteke var frábær. Tottenham réð ekki við hann og það var vonbrigði að hann hafi fengið rautt spjald."