Fótboltamenn þurfa að fræðast um hommafælni

Clarke Carisle, fyrrverandi formaður samtaka atvinnufótboltamanna á Englandi, segir að orðbragð sem tengist hommafælni hafi lengi verið verið notað í búningsklefum þar í landi.

Þetta segir Carlisle í viðtali við BBC sem birtist í heild sinni í kvöld en sjálfur viðurkennir hann að hafa notað óviðeigandi orðbragð á sínum ferli þegar hann spilaði með Blackpool, QPR og Burnley.

Í sama þætti segir Owen Coyle, fyrrverandi knattspyrnustjóri Burnley, Bolton og Wigan, að viðhorf manna til samkynhneigðar hafi lítið breyst á síðustu 20 árum.

Enginn leikmaður á Englandi hefur opinberað samkynhneigð sína á meðan hann spilaði síðan Justin Fashanu gerði það árið 1990.

Þjóðverjinn Thomas Hitzlsperger sem lék með Aston Villa á árum áður lagði skóna á hilluna áður en hann kom út úr skápnum í janúar og Bandaríkjamaðurinn Robbie Rogers beið með að opinbera samkynhneigð sína þar til hann var farinn frá Leeds til LA Galaxy í Bandaríkjunum.

„Ég hef notað orðbragð sem mér býður við í dag. Ég notaði það ótt og títt og hélt ég væri bara taka þátt í gríni með strákunum í klefanum,“ segir Carlisle við BBC.

„Það var svo eftir að mér var bent á hvað ég væri að segja að ég fór að skilja hversu öflug orð geta verið. Þá fór ég að passa mig. Eftir það var auðveldara að vera í búningsklefum síðustu ár míns ferils míns.“