Luis Suarez: Ég mun spila aftur með Ajax

Luis Suarez, framherji Liverpool og langmarkahæsti leikmaður ensku úrvalsdeildarinnar á þessari leiktíð, á enn góðar minningar frá tíma sínum hjá hollenska liðinu Ajax.

Suarez gekk svo langt að lofa því nánast í viðtali við hollenska blaðið Helden Magazine að hann myndi spila aftur fyrir Ajax áður en knattspyrnuferillinn er á enda.

„Ég hef alltaf sagt að ég muni einhvern tímann snúa aftur til Ajax. Ég mun koma jafnvel þótt að þjálfarinn vilji ekki fá mig. Tíminn hjá Ajax var gríðarlega mikilvægur fyrir minn feril," sagði Luis Suarez í viðtalinu í Helden-blaðinu.   

„Skipulagningin innan klúbbsins var frábær og Ajax var hárrétta félagið fyrir mig. Ég lærði mjög mikið hjá Ajax ekki síst í því að spila án bolta og hugsa um liðið," sagði Suarez.

„Ég var djúpt snortinn yfir því hvernig þau kvöddu mig. Ég var ánægður með alla hjá Ajax og þau voru ánægð með mig. Þess vegna er ég viss um að ég muni spila aftur með Ajax. Ég er sannfærður um það," sagði Suarez.

Luis Suarez er 27 ára gamall en hann er með samning við Liverpool til ársins 2018. Hann hefur skorað 31 mark og lagt upp 21 til viðbótar í 32 leikjum með Liverpool í ensku úrvalsdeildinni á þessu tímabili.