Þjálfari Kolbeins vill stýra Tottenham eða Liverpool

Frank de Boer, þjálfari hollenska meistaraliðsins Ajax sem Kolbeinn Sigþórsson leikur með, er opinn fyrir því að stýra Tottenham eða Liverpool í framtíðinni en bæði félög hafa reynt að fá hann til starfa.

De Boer, sem er fyrrverandi landsliðsmaður Hollands, tók við Ajax árið 2010 og vann þriðja meistaratitilinn í röð þar í landi síðasta vor.

Honum hafnaði beiðni Tottenham um að taka við liðinu eftir að André Villas-Boas var rekinn fyrr í vetur og þá segir hann að Liverpool hafi einnig haft áhuga á sér áður.

„Þessi tvö félög (Liverpool og Tottenham) eru félög sem ég gæti séð mig stýra í framtíðinni. Saga þessara félaga og möguleikarnir með liðin er eitthvað sem mér líkar,“ segir De Boer í viðtali við BBC.

„Núna er ég samt ekki að hugsa um þessa hluti því ég er ánægður hjá Ajax. Mér liggur ekkert á að fara því enn sem komið er eru menn ánægðir með mín störf.“

De Boer staðfestir í viðtalinu að Liverpool og Tottenham hafi komið að máli við hann í fortíðinni en hann hafnaði eins og áður segir að taka við Tottenham fyrr á þessari leiktíð.

„Tottenham hafði samband við umboðsmann minn þegar Villas-Boas var rekinn en ég sagði nei. Mér fannst þetta ekki réttur tímapunktur,“ segir Frank De Boer.