Carragher: Eiga titilinn ekki skilið út af varnarleiknum

Jamie Carragher, fyrrverandi miðvörður Liverpool sem starfar sem knattspyrnusérfræðingur hjá Sky Sports í dag, hafði eðlilega fátt fallegt að segja um varnarleik liðsins í gærkvöldi.

Liverpool fór langt með að kasta frá sér Englandsmeistaratitlinum þegar það missti niður 3-0 forystu á Selhurst Park og gerði 3-3 jafntefli við nýliða Crystal Palace en Liverpool fékk á sig þrjú mörk á tíu mínútna kafla undir lok leiksins.

„Þegar litið er á varnarleikinn á liðið ekki skilið að verða Englandsmeistari,“ sagði Carragher í gærkvöldi en hann er ekki hrifinn af því þegar miðverðirnir Martin Skrtel og Mamadou Sakho spila saman.

„Sakho gerir mann stressaðann. Þeir fá alltaf á sig mörk saman. Þetta er bara ekki nógu gott. Síðustu 20 mínúturnar voru óboðlegar. Þetta lið fær á sig alltof mörg mörk.“

„Það er ekki hægt að láta pressa sig svona alltaf. Liverpool slapp með þetta gegn Norwich í síðustu viku en lærði ekki sína lexíu. Þetta er búið að ganga á í nokkra mánuði og nú er liðið búið að kasta frá sér Englandsmeistaratitlinum,“ sagði Jamie Carragher.